HEGAKA: istorio baten soinua

Aurreko abenduaren 18an, Bilborock aretoan bizipen berezi eta hunkigarria izan genuen: HEGAKA izeneko kontzertu antzeztuaren estreinaldia. Kontzertu hutsa baino askoz gehiago izan zen: musika eta antzerkia uztartzen zituen proposamen artistiko bat, emakume baten istorioaren bidez emozioak eta gogoetak plazaratzeko sortua. Xabier M. Aretxabaletak zuzendu zuen musikalki, eta Getari Etxegaraik eszenikoki gidatu zuen. Getariren testuan oinarrituta, Grace Donizek Kattalin Zubiaurreren rola antzeztu zuen: isilaraziak izan diren emakume askoren sinboloa. Gure ahotsak, euskal musika koralaren bidez, istorio horri soinua eta arnasa emateko baliatu genituen.

Proiektu hau Bilboko Udalaren PLAN BILBAO 2022 programaren laguntzari esker gauzatu ahal izan dugu, eta Akelarre Abesbatzarentzat erronka handi eta berritzailea izan da. Ohiko kontzertu formatutik harago, espazio berria, kolaboratzaile berriak eta diziplina arteko hizkuntza eszenikoak barneratu zituen. Hori guztia koordinatzea ez da lan makala izan. Gure eguneroko jardunean ohikoak ez diren alor guztiak zaindu behar izan ditugu. Ikaskuntza eta hazkunde artistiko zein antolatzaile handia ekarri digu esperientzia honek.

Akelarre Abesbatza osatzen dugunok autogestioan oinarritzen gara: ez dugu egitura administratibo finkorik, eta baliabide ekonomiko mugatuak ditugu. Hala ere, proiektu hau aurrera eramateko gure barruko baliabideetan eta gertuko jendearen laguntzan oinarritu gara, beti bezala. Emaitzarekin oso pozik gaude: jendearen harrera beroa izan da, eta formatuaren berritasuna eta indarra nabarmendu dituzte. HEGAKA gure ibilbidean mugarri bat izan da, eta antzeko bideak urratzeko gogoz geratu gara.